’’تو ہم نے ان کو کیفرِ کردار کو پہنچا دیا اور انھیں سمندر میں غرق کر دیا بوجہ اس کے کہ انھوں نے ہماری نشانیوں کو جھٹلایا اور ان سے بے پروا بنے رہے۔ اور جو لوگ دبا کے رکھے گئے تھے ہم نے ان کو اس سرزمین کے مشرق و مغرب کا وارث ٹھہرایا جس میں ہم نے برکتیں رکھی تھیں اور تیرے رب کا اچھا وعدہ بنی اسرائیل پر پورا ہوا بوجہ اس کے کہ وہ ثابت قدم رہے اور ہم نے فرعون اور اس کی قوم کی ساری تعمیرات اور ان کے سارے باغ و چمن ملیامیٹ کر دیے۔‘‘ (۱۳۴۔۱۳۷)

دوسری صورت یہ کہ اگر رسول کو ہجرت کے بعد کسی خطۂ ارض میں سیاسی اقتدار حاصل ہو جائے تو پھر سرکش قوم کو سزا اس کے لشکر کی تلواروں کے ذریعے سے ملتی ہے۔ رسول اللہ صلی اللہ علیہ وسلم کی قوم کے سرکشوں کے ساتھ یہی معاملہ ہونا تھا۔ ہجرت کے بعد آپ صلی اللہ علیہ وسلم کو یثرب میں سیاسی اقتدار حاصل ہو گیا، لہٰذا اب کفار پر عذابِ الٰہی لشکرِ نبوی کے ذریعے سے آنا تھا۔ اس ضمن میں بعد میں سورۂ توبہ میں کفار کو قتل کرنے کا حکم بھی دیاگیا۔ آپ صلی اللہ علیہ وسلم نے اس سزا کے نفاذ کے لیے مکہ میں لشکر کشی بھی کی، مگر کفار نے اسلام قبول کر لیا۔
بہرحال اس وقت معرکۂ بدر زیر بحث ہے، اس لیے ہم دوبارہ اس کی طرف آتے ہیں۔
جب مدینہ میں مسلمانوں کی ریاست قائم ہوئی تو کفار نے مسلمانوں پر حملہ کرنے کا ارادہ کر لیا۔ وہ مدینہ میں مسلمانوں کے قوت بننے سے بہت خائف تھے۔ مذہبی عناد کے علاوہ انھیں یہ بھی اندیشہ تھا کہ اب مکہ اورشام کی تجارتی شاہراہ ان کے لیے محفوظ نہیں رہی۔ وہ اس فکر میں تھے کہ کوئی عذر ملے اور مسلمانوں کو قوت بننے سے پہلے ہی ختم کر دیں۔ کفارِ مکہ کے ایک تجارتی قافلے نے مدینہ کے قریب سے گزرنا تھا۔ ابوسفیان قافلۂ تجارت کے سالار تھے۔ انھوں نے مسلمانوں کی طرف سے وہمی خطرے کی وجہ سے قریش کو مسلمانوں پر حملے کے لیے کہا یا قریش کے لیڈروں نے کوئی سازش تیار کی، بہرحال تجارتی قافلے کی حفاظت کے بہانے ایک بھاری بھرکم لشکر مدینہ کی طرف روانہ ہو گیا۔
ادھر اللہ تعالیٰ نے رسول اللہ صلی اللہ علیہ وسلم کو ایک رویا کے ذریعے سے اس لشکر کی آمد کا مشاہدہ کرا دیا۔ اور ساتھ ہی یہ حقیقت پہلے ہی سے واضح کر دی کہ یہ لشکر مسلمانوں سے مغلوب ہو جائے گا۔ حتیٰ کہ کفار کے خاص خاص لیڈر قتل ہو کر جہاں جہاں گریں گے، وہ جگہیں بھی رویا میں دکھا دیں۔ مسلمانوں کو کفار کے خلاف نکلنے کا جو اللہ نے حکم دیا، اس کی وجہ اس طرح بیان کی کہ:

’’اللہ تعالیٰ اپنے حکموں سے یہ چاہتا ہے کہ حق کا بول بالا کرے اور کافروں کی جڑ کاٹ دے۔‘‘ (الانفال۸: ۷۔۸)

یعنی فتح کی نوید حکم کے ساتھ ہی سنا دی۔ چنانچہ مسلمان اور کفار آمنے سامنے ہوئے، معرکہ ہوا اور کفار کو عبرت ناک شکست ہوئی۔ ان کے بڑے بڑے سردار انھی جگہوں پر قتل ہوئے جن کی خبر رسول اللہ صلی اللہ علیہ وسلم کو پہلے سے دے دی گئی تھی۔
اللہ تعالیٰ نے یہ حقیقت قرآنِ مجید میں واضح کر دی ہے کہ معرکۂ بدر مسلمانوں کی کسی تدبیر یا تدبر کا کرشمہ نہیں تھا۔ یعنی خدا نے حضور کو رویا کے ذریعے سے کفار کے لشکر کی خبر پہلے سے دے دی۔ رویا میں کفار کا لشکر کم کر کے دکھایا تاکہ مسلمانوں میں خوف و ہراس پیدا نہ ہو اور ان کا مورال نہ گرے۔ جنگ سے قبل میدان میں مسلمانوں کو پانی میسر نہ آیا تو آسمان سے پانی برسا دیا۔ سخت تناؤ کے حالات میں بھی مسلمانوں پر نیند طاری کر دی، جس سے وہ تازہ دم ہو گئے۔ جب مسلمانوں کا کفار کے لشکر سے آمنا سامنا ہوا تو کفار کو مسلمانوں کا لشکر بڑادکھائی دیا اور مسلمانوں کوکفار کا لشکر چھوٹا نظر آیا۔ حضور نے مٹھی بھر خاک زمین سے اٹھائی اور کفار کی طرف پھینکی، جو ایسا طوفان بن گئی جس سے کفار کو اپنی اپنی آنکھوں کی پڑ گئی۔ فرشتے بطور کمک میدانِ بدر میں اترے، جس سے کفار کے سر گاجرمولی کی طرح کٹے۔
دیکھ لیجیے، سورۂ انفال میں معرکۂ بدر ہی کے حوالے سے بیان ہوا ہے:

’’یاد کرو جب اللہ تیری رویا میں ان کو کم دکھاتا ہے۔ اور اگر زیادہ دکھا دیتا تو تم پست ہمت ہو جاتے اور معاملے میں اختلاف کرتے، لیکن اللہ نے بچا لیا۔ بے شک وہ دلوں کے حال سے باخبر ہے۔ اور خیال کرو جب کہ تمھاری مڈبھیڑ کے وقت ان کو تمھاری نظروں میں کم دکھاتا ہے اور تم کو ان کی نظروں میں کم دکھاتا ہے تاکہ اس امر کا فیصلہ فرما دے جس کا ہونا طے شدہ تھااور سارے معاملات اللہ ہی طرف لوٹتے ہیں۔‘‘ (۸: ۴۲۔۴۴)

’’اور یاد کرو جب کہ تم اپنے رب سے فریاد کر رہے تھے تو اس نے تمھاری فریاد سنی کہ میں ایک ہزار فرشتے تمھاری کمک پر بھیجنے والا ہوں جن کے پرے کے بعد پرے نمودار ہوں گے۔ اور یہ صرف اس لیے کیا کہ تمھارے لیے خوش خبری ہو اور اس سے تمھارے دل مطمئن ہوں۔ اور مدد تو خدا ہی کے پاس سے آتی ہے۔ بے شک اللہ عزیز و حکیم ہے۔ یادکرو جب کہ وہ تم کو چین دینے کے لیے اپنی طرف سے تم پر نیند طاری کر دیتا ہے اور تم پر آسمان سے پانی برسا دیتا ہے تاکہ اس سے تم کوپاکیزگی بخشے اور تم سے شیطان کے وسوسے کو دفع کرے اور تاکہ اس سے تمھارے دلوں کومضبوط کرے اور قدموں کوجمائے۔ یاد کرو جب تمھارا رب فرشتوں کووحی کرتا ہے کہ میں تمھارے ساتھ ہوں تو تم ایمان والوں کو جمائے رکھو۔ میں کافروں کے دلوں میں رعب ڈال دوں گا تو مارو ان کی گردنوں پر اور مارو ان کے پور پور پر۔ یہ اس سبب سے کہ یہ اللہ اور اس کے رسول کے مقابلہ کو اٹھے ہیں اور جو اللہ و رسول کے مقابلہ کواٹھتے ہیں تو اللہ ان کے لیے سخت پاداش والا ہے۔ سو یہ تو نقد چکھو اور کافروں کے لیے دوزخ کا عذاب ہے۔‘‘ (۸: ۹۔۱۴)

’’پس تم لوگوں نے ان کو قتل نہیں کیا، بلکہ اللہ نے ان کو قتل کیا اور جب تو نے ان پر خاک پھینکی تو تم نے نہیں پھینکی، بلکہ اللہ نے پھینکی کہ اللہ اپنی شانیں دکھائے اور اپنی طرف سے اہل ایمان کے جوہر نمایاں کرے۔ بے شک اللہ سننے والا جاننے والا ہے۔ یہ جو کچھ ہوا سامنے ہے اور اللہ کافروں کے سارے داؤں بے کار کر کے رہے گا۔‘‘ (۸: ۱۷۔۱۸)

اس کے علاوہ مزید دیکھیے، فتح کے بعد جو مالِ غنیمت مسلمانوں کے ہاتھ آیا، اس کے بارے میں بعض کمزور قسم کے مسلمانوں میں نزاع پیدا ہو گئی کہ اس کی تقسیم کس طرح ہونی چاہیے تو اللہ تعالیٰ نے ان مسلمانوں پر واضح کر دیا کہ یہ مال اللہ اور رسول کا ہے، (یعنی مسلمانوں کی اجتماعی ملکیت ہے)، اس کے ساتھ وہ جو چاہیں گے، معاملہ کریں گے۔ سورۂ انفال ہی میں ہے:

’’وہ تم سے غنائم کے بارے میں پوچھتے ہیں، انھیں بتا دو کہ غنائم سب اللہ اور رسول کے لیے ہیں۔ (۸: ۱)

اس کی وجہ یہی تھی کہ یہ جنگ تو دراصل اللہ تعالیٰ نے لڑی تھی۔ اس میں مسلمانوں کی حیثیت محض ایک ذریعے کی سی تھی۔ لہٰذا معرکۂ بدر خدا کے دنیا پر رسول اللہ صلی اللہ علیہ وسلم کے ذریعے سے ’’قیامتِ صغریٰ‘‘ برپا کرنے کے سلسلے کی ابتدا تھی۔ چنانچہ اس میں عام سرکش کفار کے ساتھ ساتھ ان کے سرداروں کو عبرت ناک موت کی سزا دی گئی۔
علامہ شبلی نعمانی نے اپنی مشہور کتاب ’’سیرت النبی‘‘ میں جنگِ بدر کو صرف مادی پہلو سے دیکھنے والوں پر تنقید کی، مگر حیرت ہے کہ پھر ان کی تائیدمیں لکھناشروع کر دیا۔ مگر دلچسپ بات یہ ہے کہ اس ضمن میں انھوں نے جو اسباب بیان کیے، وہ بھی درحقیقت اور زیادہ تر ’’غیرمادی‘‘ ہی تھے۔ شبلی نے لکھا:

’’مغربی مورخین کو جن کے نزدیک عالم اسباب میں جو کچھ ہے صرف اسبابِ ظاہر کے نتائج ہیں، حیرت ہے کہ تین سو پیدل آدمیوں نے ایک ہزار جن میں سو سواروں کا رسالہ تھا، پر کیونکر فتح پائی، لیکن تائیدِ آسمانی نے بارہا ایسے حیرت انگیز مناظر دکھائے ہیں۔ تاہم اس واقعہ میں ظاہر بینوں کے اطمینان کے سامان بھی موجود ہیں۔ اوّل تو قریش میں باہم اتفاق نہ تھا۔ عتبہ سردارِ لشکر لڑنے پر راضی نہ تھا۔ قبیلہ زہرہ کے لوگ بدر تک آ کر واپس چلے گئے۔ پانی برسنے سے موقعِ جنگ کی حالت یہ ہو گئی تھی کہ قریش جہاں صف آرا تھے وہاں کیچڑ اور دلدل کی وجہ سے چلنا پھرنا مشکل تھا۔ قریش مرعوب ہو کر اسلامی فوج کا تخمینہ غلط کر رہے تھے یعنی اپنی تعداد سے دوگنا۔ چنانچہ قرآنِ مجید میں ہے:

یَرَوْنَھُمْ مِثْلَیْہِمْ رَاْیَ الْعَیْنِ۔(آل عمران۳: ۱۳)
’’وہ اپنی آنکھوں سے مسلمانوں کو اپنے آپ سے دوگنا دیکھ رہے تھے۔‘‘

کفار کی فوج میں کوئی ترتیب اور صف بندی نہ تھی، بخلاف اس کے آنحضرت صلی اللہ علیہ وسلم نے خود دستِ مبارک میں تیر لے کر نہایت ترتیب سے صفیں درست کی تھیں۔ مسلمان رات کو اطمینان سے سوئے تھے، صبح اٹھے تو تازہ دم تھے۔ بخلاف اس کے کفار بے اطمینانی کی وجہ سے رات کو سو نہ سکے تھے۔‘‘ (ا/ ۲۰۱۔۲۰۲)

قیامتِ کبریٰ کی یاددہانی اور دنیا میں اس کا ایک حسی نمونہ دکھانے کے بیان کا یہ جو سلسلہ قرآن میں جگہ جگہ مذکور ہے۔ اسی طرح احادیث اور سیرت کی کتابوں میں بھی بیان کیے گئے بہت سے واقعات اسی سلسلے کی کڑی ہیں، مگر ہمارے ہاں ان واقعات کو اس مخصوص پس منظر کے بغیر سمجھنے کی کوشش کی جاتی ہے جس سے غلط فہمیوں اور کج فکریوں کی ایک دنیا وجود میں آ جاتی ہے جو مسلمانوں کو بالخصوص اور غیر مسلمانوں کو بالعموم مشکلات میں ڈال دیتی ہے۔
کاش! اہل اسلام قرآن، حدیث اور تاریخ میں موجود اس مخفی حقیقت کو دیکھ سکیں، اسے سمجھ سکیں اور اس کو پیش نظر رکھ کر اپنے نقطۂ نظر اور لائحۂ عمل تشکیل دے سکیں۔

۱ ؂ یہاں یہ واضح رہے کہ قیامت صغریٰ برپا کرنے کا معاملہ نبیوں کے ذریعے سے نہیں، بلکہ رسولوں کے ذریعے سے ہوتا ہے۔

------------------------------

بشکریہ ماہنامہ اشراق